គម្រោងអភិវឌ្ឍប្រព័ន្ធផ្កាយរណបរបស់ប្រទេសកម្ពុជាបានចាប់ផ្តើមលេចចេញពន្លឺ ដែលគម្រោងនេះត្រូវការចំណាយខ្ពស់។ ទោះបីត្រូវរ៉ាប់រងចំណាយកប់ក្តោង ពលរដ្ឋជាច្រើនគាំទ្រគម្រោងនេះ ដើម្បីបញ្ជាក់ពីស្វ័យភាពនិងការត្រៀមប្រកួតប្រជែងប្រទេសក្នុងតំបន់។
លោក ឆុន វាសនា អនុប្រធាននាយកដ្ឋានបច្ចេកទេស វិទ្យុជាតិកម្ពុជាទទួលបន្ទុកផ្នែក ICT នៃក្រសួងព័ត៌មានប្រាប់ Sabay ថា គម្រោងបង្ហោះផ្កាយរណប ជាការបោះជំហានថ្មីមួយទៀតរបស់ប្រទេសកម្ពុជា ដើម្បីបញ្ជាក់ពីស្វ័យភាពនិងការប្រកួតប្រជែងជាមួយប្រទេសក្នុងតំបន់។ លោកថា វាជាមុខមាត់ ដែលកម្ពុជាចាប់ផ្តើមគួរគិតគូរពីការអភិវឌ្ឍបច្ចេកវិទ្យានេះ ដែលនឹងជួយបម្រើប្រយោជន៍ជាតិជាច្រើន បើសិនគម្រោងនេះទទួលបានជោគជ័យ។ លោក ស៊ុន រ៉ាពីដ អនុប្រធានវិទ្យាស្ថានជាតិ NIPTICT នៃក្រសួងប្រៃសណីយ៍ និងទូរគមនាគមន៍ផ្តល់ការយល់ឃើញដែរថា ការអភិវឌ្ឍគម្រោងនេះ នឹងជួយពលរដ្ឋរស់នៅតំបន់ដាច់ស្រយាល ទទួលបានព័ត៌មានកាន់តែឆាប់រហ័ស ពង្រីកប្រព័ន្ធផ្សព្វផ្សាយកាន់តែទូលំទូលាយ ប្រព័ន្ធទូរសព្ទចល័ត និងបង្កើនទំនាក់ទំនងបានពេញលេញ។ លោកថា បច្ចុប្បន្នការប្រើប្រាស់អ៊ីនធឺណិតនៅកម្ពុជាមានច្រើនជាង ៦០%។ នៅពេលគម្រោងនេះដំណើរការ នឹងជួយអភិវឌ្ឍស្ទើរតែគ្រប់ផ្នែកជាពិសេសផ្នែកសុខាភិបាល គ្រោះមហន្តរាយផ្សេងៗជាដើម។ មិនខុសគ្នានេះ លោក យិន ស៊ីដេត សាស្ត្រាចារ្យផ្នែក IT និងជំនាញជួសជុលបង្រៀននៅវិទ្យាស្ថាន ស៊ីតិច បានប្រាប់ថា ទោះបីជាត្រូវចំណាយប្រាក់ច្រើន លោកគាំទ្រដែលកម្ពុជាចាប់ផ្តើមអភិវឌ្ឍប្រព័ន្ធផ្កាយរណបផ្ទាល់ខ្លួន។ លោកថា ប្រទេសជាច្រើននៅក្នុងតំបន់ បានអភិវឌ្ឍបច្ចេកវិទ្យាផ្កាយរណបនេះមុនមួយជំហាន ប៉ុន្តែវាមិនទាន់ហួសពេលដែលកម្ពុជានឹងចាប់ផ្តើមដើម្បីអាចម្ចាស់ការខ្លួនឯង។ ងាកមកពលរដ្ឋមួយរូប ក៏គាំទ្រទោះបីជាត្រូវការចំណាយច្រើន។ ជាគ្រូបង្រៀនដែរនោះ លោកថា គម្រោងនេះវាពិតជានាំប្រយោជន៍មិនអាចគណនាបាន ក៏ដូចជាការនាំប្រយោជន៍ កេរ្តិ៍ឈ្មោះមុខមាត់ដល់ប្រទេសជាតិ។ កម្ពុជាបានឈានទៅដល់ការចុះកិច្ចព្រមព្រៀង សម្រាប់ការបាញ់បង្ហោះផ្កាយរណបលើកដំបូងនៅពេលខាងមុខនេះ។ គម្រោងនេះ មានការចូលរួមពីដៃគូឯកជន និងការជួយគាំទ្រពីរដ្ឋាភិបាលចិន ដែលមានបទពិសោធក្នុងការធ្វើគម្រោងបាញ់បង្ហោះផ្កាយរណបជាមួយប្រទេសឡាវ កាលពីឆ្នាំ ២០១៥។ ការប៉ាន់ស្មានបឋម គម្រោងការបង្ហោះផ្កាយរណបដំបូងរបស់កម្ពុជា ត្រូវការថវិកាប្រមាណ ១៥០ លានដុល្លារ និងដាក់ឲ្យដំណើរការនៅឆ្នាំ ២០២១ ឬឆ្នាំ ២០២២។ នេះបើអ្នកនាំពាក្យនិយ័តករទូរគមនាគមន៍កម្ពុជា (TRC) លោក អ៊ឹម វុត្ថា លើកឡើងកន្លងទៅ៕
អត្ថបទ៖ ម៉េងងី
